శ్రీ యంత్రోద్ధారక హనుమత్ స్తోత్రం
శ్రీ హనుమత్ స్తోత్రం వ్యాసతీర్థవిరచితమ్ ॥ నమామి దూతం రామస్య సుఖదం చ సురద్రుమమ్ । పీనవృత్తమహాబాహుం సర్వశత్రునిబర్హణమ్ ॥ ౧॥ నానారత్నసమాయుక్తకుణ్డలాదివిభూషితమ్ । సర్వదాభీష్టదాతారం సతాం వై దృఢమాహవే ॥ ౨॥ వాసినం చక్రతీర్థస్య దక్షిణస్థగిరౌ సదా । తుఙ్గామ్భోధితరఙ్గస్య వాతేన పరిశోభితే ॥ ౩॥ నానాదేశాగతైః సద్భిః సేవ్యమానం నృపోత్తమైః । ధూపదీపాదినైవేద్యైః పఞ్చఖాద్యైశ్చ శక్తితః ॥ ౪॥ భజామి శ్రీహనూమన్తం హేమకాన్తిసమప్రభమ్ । వ్యాసతీర్థయతీన్ద్రేణ పూజితం ప్రణిధానతః ॥ ౫॥ త్రివారం యః పఠేన్నిత్యం స్తోత్రం భక్త్యా ద్విజోత్తమః । వాంఛితం లభతేఽభీష్టం షణ్మాసాభ్యన్తరే ఖలు ॥ ౬॥ పుత్రార్థీ లభతే పుత్రం యశోఽర్థీ లభతే యశః । విద్యార్థీ లభతే విద్యాం ధనార్థీ లభతే ధనమ్ ॥ ౭॥ సర్వథా మాస్తు సన్దేహో హరిః సాక్షీ జగత్పతిః । యః కరోత్యత్ర సన్దేహం స యాతి నరకం ధ్రువమ్ ॥ ౮॥ ఇతి శ్రీవ్యాసతీర్థవిరచితమ్ హనుమత్ స్తోత్రం సమ్పూర్ణమ్ । జై శ్రీరామ. జై హనుమాన్.